क्रिप्टो करेन्सी कारोबारमा संलग्न चार जनाविरुद्ध साढे ३७ करोडको मुद्दा

काठमाडौं
अवैध घोषणा गरेको क्रिप्टो करेन्सी कारोबारमा मुछिएका चारजनाविरुद्ध राजस्व अनुसन्धान विभागले मुद्दा चलाएको छ। विभागले एकै परिवारका ३ सहित ४ जनाविरुद्ध काठमाडौं जिल्ला अदालतमा मंगलबार मुद्दा दायर गरेको हो।

विभागले क्रिप्टो करेन्सीको कारोबारमा सम्लग्न भएको आरोपमा ३७ करोड ६४ लाख ११ हजार १ सय रुपैयाँ बिगो दाबी गरेको छ । विभागले कैलालीको लम्किचुवा स्थायी घर भएका दिनेश खड्का, उनकी दिदी भगवती, बुवा नरबहादुर र दिनेशकै साथी अनिता धितालविरुद्ध मुद्दा दायर गरेको हो।

काठमाडौं अदालतमा मुद्दा दायर भएका चारजना क्रिप्टो करेन्सीको कारोबारमा संलग्न रहेको विभागको अनुसन्धानले देखाएको छ। दिनेशले आफ्नो बैंक अकाउन्टबाट ९ करोड ७९ लाख ९८ हजार ५ सय ८१ रुपैयाँको कारोबार गरेको विभागले दाबी गरेको छ।

त्यस्तै, उनकी दिदी भगवतीको खाताबाट २० करोड ४२ लाख ९४ हजा रुपैयाँ बढी र बुवा नरबहादुरको बैंक खाताबाट ६४ लाख ११ हजार कारोबार भएको देखिएको छ। त्यसैगरी दिनेशकी साथी अनिताको खाताबाट ५ करोड ७७ लाख रुपैयाँ बढीको कारोबार भएको विभागले जनाएको छ।