लेलेको खोँचमा एक युवक मृत अबस्थामा फेला, टिप्परले हानेको आशंका

काठमाडौं
ललितपुरको गोदावरी नगरपालिका–६ स्थित फैडोलको खोँचमा एक युवक मृत अबस्थामा फेला परेका छन् । लेले सडकका लागि पर्खाल बनाउन खनिएको खोँचमा सोमबार बिहान मोटरसाइकल सहित ती युवक मृत फेला परेका हुन् । ती युवक गोदावरीकै चापागाउँ निवासी विज्ञान देशार रहेको प्रहरी वृत्त चापागाउँले जनाएको छ ।

घटना आइतबार बेलुकी १० बजेतिरको हुन सक्ने प्रहरीको आँकलन रहेको छ । प्रदेश ३–०२–००७ प ६३८५ नम्बरको २२० सीसीको पल्सर मोटरसाइकलको पछाडीको भाग पुरै कुच्चिएको छ । त्यस सडकमा टिप्पर गाडी धेरै गुड्ने र मोटरसाइकलको पछाडिको भाग कुच्चिएका कारण टिप्परले पछाडिबाट हानेको हुन सक्ने मृतकका परिवारले आशंका गरेका छन् । तर वृत्त चापागाउँले भने टिप्परले हानेको कुनै संकेत नदेखिएको र अनुसन्धानकै क्रममा रहेको जनाएको छ ।