निर्माण व्यवसायीलाई भुक्तानीको समस्या छैनः प्रधानमन्त्री प्रचण्ड
![निर्माण व्यवसायीलाई भुक्तानीको समस्या छैनः प्रधानमन्त्री प्रचण्ड](https://snowberry.prixacdn.net/media/gallery_folder/Prachanda0-2_pNoORB2EKk_guqlsnncht0yb5q2hps4bja1lefqq6lwppfl1o3vzdmohnjmsqnounwcbyho_APvbea58d2_gjj5r98ndvctkkmpnrhj6te5wkseues8i8nmwhu8fmhhm5cw0icxdmg86feo_Zfvuys5b2C_74odyxkdljkljn3kdmno8nwoljgcn2cut0hwi9jooavenqfjk2yhfxrynsvf_wkdnAuraTe_hij8rsulqvsjdfemijd4htzo9s6e7qbjufmyvkiisij7cs9wknzvd3by8uxu_5cgyqkgFcx_o2sdkabi4reddnu5dymavsvwy0bvs0s8tzhvd1qthy8lklglrhqx8mhwnrtb.jpg)
काठमाडौं । प्रधानमन्त्री पुष्पकमल दाहाल प्रचण्डले निर्माण व्यवसायीलाई उपलब्ध गराउनुपर्ने भुक्तानीमा कुनै समस्या नरहेको बताएका छन् ।
बिहीबार प्रतिनिधि सभाको बैठकमा प्रधानमन्त्रीसँग प्रश्नोत्तर कार्यक्रममा सांसदहरुले सोधेका प्रश्नहरूको जवाफ दिँदै प्रधानमन्त्रीले प्रचण्डले पुष्पलाल मध्यपहाडी लोकमार्गको केही खण्डमा रेखाङ्कन विवादले निर्माण कार्य अगाडि बढ्न नसकेको, भुक्तानीका कारण नभएको बताए ।
पोखरा अन्तर्राष्ट्रिय विमानस्थल दिगो सञ्चालनका सम्बन्धमा सरोकारवालाहरूसँग छलफल र समन्वय गरी तदारूकताकासाथ कार्य भइरहेको बताउँदै प्रधानमन्त्री प्रचण्डले अन्य मुलुकका अन्तर्राष्ट्रिय वायुसेवाहरूले पोखरा विमानस्थलबाट सेवा सञ्चालन गर्नका लागि विभिन्न छूटहरू तथा सहुलियतहरू माग भएको जानकारी दिए । यो विषयमा समन्वय भइरहेको बताए ।
‘पोखरा अन्तर्राष्ट्रिय विमानस्थल लगायत तीनवटै अन्तर्राष्ट्रिय विमानस्थलहरू दिगो रूपमा सञ्चालन गर्न सार्वजनिक निजी साझेदारीमा सञ्चालन र निर्माण सम्बन्धमा सुझाव पेश गर्न कार्य समिति गठन भएको छ’ प्रधानमन्त्री प्रचण्डले भने, ‘समितिको प्रतिवेदन तथा सिफारिश प्राप्त भएपछि अन्तर्राष्ट्रिय विमानस्थलहरू सार्वजनिक निजी साझेदारी वा अन्य उपयुक्त सञ्चालनको विधि तयगरी कार्यान्वयनमा ल्याइने छ ।’
प्रतिक्रिया