पूर्वराज्यमन्त्री रायको हत्याको घटनाको निष्कर्षतिर प्रहरी
![पूर्वराज्यमन्त्री रायको हत्याको घटनाको निष्कर्षतिर प्रहरी](https://snowberry.prixacdn.net/media/gallery_folder/body_4GvtefHi8T_ezuz3i57fhhyaxjewxarre3mlqomlui2v5zwqq7z8l6yothpzwcvyqcf47nn_VymmGrcN9e_o09m7nawacudvsqxqlzoedjfspucqwnmaiobf9qi8yljmhiyp1biqppcvbuh.jpg)
काठमाडौं । सर्लाहीमा भएको पूर्वराज्यमन्त्री रामचन्द्र रायको हत्यामा उनकै घरमा काम गर्ने युवक संलग्न भएको निष्कर्षतर्फ प्रहरी पुगेको छ ।
चन्द्रनगर गाउँपालिका–१ स्थित ‘फार्म हाउस’मा हत्या गरिएको अवस्थामा रायको शव सोमबार बिहान भेटिएको थियो । काठमाडौंमा बस्दै आएका राय खेतीको कामका लागि गाउँ पुगेका थिए । घटनापछि प्रहरीले रायको सहयोगीका रुपमा काम गर्दै आएका २१ वर्षीय रामउजैन रायलाई नियन्त्रणमा लिएको थियो ।
‘अहिलेसम्मको अनुसन्धानबाट तीनै युवकले रायको हत्या गरेको देखिन्छ । सामान्य गाली गरेको निहुँमा उनले उखु काट्ने हतियारले सुतिरहेको अवस्थामा रायको टाउकोमा हानेर हत्या गरेको देखिन्छ’, अनुसन्धानमा खटिएका एक अधिकारीले भने ।
यसअघि ती युवकले राति ३ जना युवक आएको र उनीहरुले रायसँग कुराकानी गरिरहेका बेला आफू सुत्न गएको प्रारम्भिक बयान दिएका थिए । घटनाबारे आफूले चाल नपाएको उनको भनाइ थियो ।
प्रहरीले ती युवकले झूटो बयान दिएको र घरमा त्यस दिन कोही नआएको निष्कर्ष निकालेको छ । ‘अझै केही कुरा क्लियर गर्न बाँकी छ । अहिलेसम्मको अनुसन्धानमा ती युवक नै घटनामा संलग्न रहेको देखिन्छ’, ती अधिकारीले भने ।
प्रहरीका अनुसार २१ वर्षीय युवक विगतमा काठमाडौंस्थित रायको घरमा रहेर सहयोगीको काम गरेका थिए । विगत डेढ दुई महिनायता फेरि उनी रायको सहयोगी बनेर चन्द्रपुरस्थित फार्म हाउसमा काम गर्न आएको प्रारम्भिक अनुसन्धानबाट देखिएको प्रहरीले जनाएको छ ।
प्रतिक्रिया