निर्मला हत्या काण्डः धेरै टोलीबाट अनुसन्धान, नतिजा अझै रहस्यमय

काठमाडौं
बहु चर्चित काण्डको रुपमा परिचित निर्मला पन्त हत्या काण्ड अझै रहस्यमय छ । कञ्चनपुरस्थित भीमदत्त नगरपालिका–२, उल्टाखाम निवासी १३ वर्षीया बालिका निर्मला पन्तको हत्या भएको तीन वर्ष नागिसकेको छ । ०७५ साउन १० गते बलात्कारपछि निर्मलाको हत्या भएको थियो ।

उनीको हत्याको अनुसन्धान गर्न विभिन्न अनुसन्धान टोली समेत बन्यो । प्रतिवेदन सार्वजनिक भयो । तर अझै पनि हत्या आरोपित पत्ता नलाग्द घटना थप रहस्यमय बनेको छ । यस घटनाले धेरै समय सडक तातिए, राष्ट्रिय तथा अन्तर्राष्ट्रिय रुपमा समेत बहस भयो ।

गृह मन्त्रालयका सहसचिव हरिप्रसाद मैनालीको टोली, राष्ट्रिय मानव अधिकार आयोग, मानव अधिकार संगठन र प्रहरी प्रधान कार्यालयका तत्कालीन डीआईजी धिरु बस्न्यातको नेतृत्वमा पनि छुट्टाछुट्टै प्रतिवेदनहरु तयार भएका थिए । निर्मला हत्या प्रकरणको अनुसन्धानका लागि अहिलेसम्म दर्जन बढी टोली कञ्चनपुरमा खटिइसकेका छन्

हुन त अनुसन्धान टोलीहरुले ठोस निष्कर्ष निकाल्न नसकेपछि अनुसन्धानको सुई पुरानै अभियुक्त दिलिपसिंह विष्टतिरै सोझ्याउने प्रयास पनि प्रहरीको उच्च स्रोतबाट भइरहेको छ । तर, अनुसन्धान अधिकृतहरुले ‘विज्ञानलाई चुनौति दिने’ आँट गर्न सकिरहेका छैनन् । किनभने, डीएनए परीक्षणबाट दिलिपसिंह बिष्ट थुनामुक्त भएको अवस्था छ ।