पाटन स्ववियु अध्यक्ष विष्टकी श्रीमती अर्कैको परीक्षा दिँदै गर्दा रंगेहात समातिइन

काठमाडौं । अर्कै विद्यार्थीको परीक्षा दिईरहेको अबस्थामा प्रहरीले एक नक्कली विद्यार्थीलाई पक्राउ गरेको छ । पक्राउ पर्नेमा पाटन संयुक्त क्याम्पसका स्ववियु अध्यक्ष सुशिल विष्टकी श्रीमती निलम सुवेदी रहेका छन् । उनलाई काठमाडौंको प्रदर्शनीमार्गस्थित रत्न राज्यलक्ष्मी क्याम्पस परीक्षा केन्द्रबाट प्रहरीले १० भदौमा पक्राउ गरेको हो । हाल उनलाई महानगरीय प्रहरी वृत्त सिंहदरबारमा राखी प्रहरीले अनुसन्धान गरिरहेको छ । उनीविरुद्ध शिक्षा ऐन अनुसार सार्वजनिक मुद्धामा म्याद थप गरी थप अनुसन्धान भईरहेको वृत्त स्रोतले बतायो । 

परीक्षार्थी कृष्णकुमारी सिंहको परीक्षा दिँदै गर्दा उनलाई प्रहरीले पक्राउ गरेको हो ।  सुवेदीले पनि आफूले सिंहको परीक्षा दिएको स्वीकारेकी छन् । उनले त्रिभुवन विश्वविद्यालय डीनको कार्यालयलाई लेखेको पत्रमा आफ्नो परिचय खुलाउँदै भनेकी छन्– ‘मानविकी तथा सामाजशास्त्र संकायको स्नातकोत्तर तह प्रथम वर्षअन्तर्गत पहिलो शैक्षिक सत्रको परीक्षामा आरडी (५५४) विषयको नक्कली परीक्षार्थी बनेर परीक्षा दिएकी हुँ ।’

सुवेदीले आफूले ५ हजार पैसा लिएर परीक्षा दिएको पनि पत्रमा उल्लेख गरेकी छन् । ‘कृष्णकुमारी सिंहले मलाई रु ५००० दिएर यो काम गर्न लगाउनु भएको हो । यसरी नै आरडी (५५४) को पनि परीक्षा दिएको छु । यतिबेला पनि मलाई ५००० दिनुभएको थियो । त्यसैले म यहाँ परीक्षा दिन आएको थिए,’ उनले लेखेको पत्रमा उल्लेख छ । उनको रिहाइको माग गर्दै नेपाल विद्यार्थी संघ धर्नामा बसेको प्रहरी स्रोतले बताएको छ ।  यस विषयमा विष्टको धारणा लिन पटक पटक सम्पर्क गर्न खोज्दा उनी सम्पर्कमा आउन चाहेनन ।