ढुंगा खानी संचालक विष्टमाथि निर्घात कुटपिट, बेहोस बनाएर गाडी मुनि हालेर भागे

विष्टलाई निर्घात कुटेपछि बेहोस बनाएर उनकै गाडि मुनि हालेर आक्रमण गर्ने मानिस भागेका थिए ।

काठमाडौं
ललितपुरको ढुंगा खानी संचालक सुदर्शन विष्टमाथि गएराति निर्घात कुटपिट भएको छ । खानीको कामले गोदावरी–७ कटुवल दह पुगेर फर्किँदै गर्दा बाटोमा उनीमाथि कुटपिट भएको हो । घटनापछि टिकाभैरबस्थित आनन्दबन अस्पतालमा उपचारपछि उनी गएराति नै घर फर्किएको स्रोतले बताएको छ । उनको मुख, आँखा, कानमा चोट पुगेको छ ।

खानीको काममा कटुवल दह पुग्दा विष्ट र अर्का खानी सञ्चालक शशी भन्ने शशीराज ठकुरीसँग व्यवसायिक विवादपछि विष्ट आफ्नो सवारी चढेर घर फर्किँदै थिए । काफलबोट भन्ने स्थानमा पुगेपछि एउटा मोटरसाइकलले बाटो छेकेर विष्टलाई गाडी बाहिर निकालेर आक्रमण गरेको बताईन्छ । विष्टलाई निर्घात कुटेपछि बेहोस बनाएर उनकै गाडि मुनि हालेर आक्रमण गर्ने मानिस भागेका थिए । स्रोतका अनुसार विष्ट र शशीको विवादपछि ती आक्रमण गर्नेलाई शशीले पिछा गर्न लगाएर कुटपिट गराएको आरोप छ । विष्टलाई त्यो मोटरसाइकलले पिछा गरिरहेको बताईएको छ ।

विष्टले आफूलाई कुटपिट गर्ने विरुद्ध प्रहरी वृत्त, चापागाउँमा किटानी जाहेरी दिएका छन् । उनीमाथि आक्रमण गर्नेको पहिचान खुलिसकेको छ । वृत्त प्रमुख टेक बहादुर कार्कीले गोदावरी–७ देविचौर बस्ने तम्बा भन्ने समिर थिङको विरुद्ध कुटपिटको जाहेरी परेको स्विकार गरेका छन् । उनका अनुसार थिङ फरार रहेकोले उनको खोजी कार्य जारी राखेको छ ।