मिटरब्याजीबाट ठगीएका १९३७ थान उजुरी गृहमाः ललितपुरको टाहाखेलका मिटरब्याजी टोलीविरुद्ध समेत दर्जन बढी उजुरी

operation kathmandu

काठमाडौं
मिटरब्याज लिएर जनता ठग्नेहरूको विरुद्ध गृह मन्त्रालयमा १ हजार ९ सय ३७ थान उजुरी परेको पाईएको छ । अहिलेसम्म विभिन्न प्रदेश र जिल्लामा गरी सो संख्यामा मिटरब्याजबाट ठगीका उजुरी परेको गृह मन्त्री बालकृष्ण खाँणले जानकारी दिए ।

मन्त्री खाँणले प्रदेश १ मा ९२ वटा, मधेस प्रदेशमा एक हजार ३३०, बागमतीमा २०२, गण्डकीमा ३५, लुम्बीनीमा २११, कर्णालीमा २२ र सुदूरपश्चिममा ४५ वटा उजुरी परेको बताए । गृहमन्त्री खाँणले मिटरब्याज लिएर जनता ठग्नेहरूलाई सरकारले अनुसन्धानको प्राथमिकतामा राखेर छानबिन र कारबाही गर्ने बताएका छन् ।

मन्त्री खाँणले वर्तमान सरकारले चालु आर्थिक वर्षको नीति तथा कार्यक्रममा नै मिटरब्याजीलाई कानुनी कारबाहीको दायराभित्र ल्याउने र मिटरब्याजीले जनतालाई दिइरहेको सास्तीलाई नियन्त्रण गर्ने नीति लिएको दाबी गरे । उनले मिटरब्याजीलाई अनुसन्धान गरी कारबाही गर्नको लागि मन्त्रालयले कार्यदल बनाएर अनुसन्धान गरिरहेको बताए ।

मन्त्री खाँणले मिटर ब्याजबाट ठगिएका आम जनतालाई उजुरी दिन आग्रहसमेत गरिएको बताए । उनले मिटर ब्याजबाट ठगिएको उजुरी भदौ ४ गते भन्दा पछाडि अनुमान गरे भन्दा धेरै रहेको जानकारी दिए । गृहमन्त्री खाँणले अहिलेसम्म परेका तथा अब पर्ने उजुरीउपर मन्त्रालयले तत्काल छानबिन र अनुसन्धान गरेर कानुनी कारबाही अगाडि बढाउने प्रतिबद्धता जनाए ।

त्यस्तै गृहमा परेको उजुरीमध्यमा ललितपुरको टाहाखेलको एक मिटरव्याजी टोली विरुद्ध समेत दर्जन बढी उजुरी परेको पाईएको छ । गृह स्रोतका अनुसार टाहाखेलका टोलीले चापागाउँ, ठेचो, लेले लगायतका स्थानका सय भन्दा बढीलाई मिटरब्याज लगाएर ठगी घरबार उठीबास गरेको समेत उजुरी परेको बताईन्छ ।